Ապրիլյան հեղափոխության հետևանքները անշարժ գույքի շուկայում

Հայաստանի Հանրապետությունում ապրիլին տեղի ունեցած հեղափոխությունից հետո  անշարժ գույքի շուկայում առքուվաճառքի զգալի աճ է նկատվել: 

Հատկապես  ավելացել է օտարերկրյա պետություններում /ԱՄՆ, Լիբանան, Ֆրանսիա, Գերմանիա, Հոլանդիա, Ռուսաստան, Իրան և այլն/ բնակվող հայերի քանակը, որոնք ակտիվորեն բնակարաններ և հողատարածքներ են գնում:

Շուկայի ակտիվությանը նպաստեց նաև 2018 թվականի սեպտեմբերի 14-ին ՀՀ ԿԱՌԱՎԱՐՈՒԹՅԱՆ 2010 ԹՎԱԿԱՆԻ ՀՈՒՆՎԱՐԻ 29-Ի N 98-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ ՈՐՈՇՈՒՄԸ՝ որով փաստորեն թեթևանում է հիփոթեքային վարկերի միջոցով բնակարան ձեռք բերողների վարկային բեռը: Մասնավորապես փոփոխությունների արդյունքում՝

• նորակառույց բնակարանների ձեռքբերման դեպքում կգործի եկամտահարկի վերադարձի օրենսդրական հնարավորությունը,

• կանխավճարը 20 %-ի փոխարեն դարձավ 10 %՝ լրացուցիչ գույքի գրավադրման պայմանով,

• հիփոթեքային վարկը տրամադրվելու է առնվազն 10 տարի մարման ժամկետով՝ առավելագույնը 9.5 %-ով, որից 2 %-ը կսուբսիդավորի պետությունը, իսկ ՀՀ մարզերում տրամադրված հիփոթեքային վարկերի համար պետությունը կսուբսիդավորի 4 %-ը, իսկ առաջնային շուկայից բնակարանի ձեռքբերման համար հիփոթեքային վարկը տրամադրվելու է առնվազն 10 տարի մարման ժամկետով՝ առավելագույնը 7.5 %-ով, որը չի սուբսիդավորվում,

• փոխվել է բնակարանի ձեռքբերման մրցույթին մասնակցող զույգերի տարիքային շեմը, համաձայն որի գումարային տարիքը կլինի 70, 60-ի փոխարեն:

Անժխտելի փաստ է, որ երկրում տեղի ունեցող ցանկացած քաղաքական փոփոխություն իր ազդեցությունն է ունենում նաև տնտեսության և մի շարք այլ կարևոր ոլորտներում: Վերջին իրադարձությունների լույսի ներքո անշարժ գույքի շուկայում տեղի է ունեցել  առքուվաճառքի ակտիվություն և գնաճ:

Եթե ուսումնասիրենք ՀՀ Անշարժ գույքի կադաստրի կոմիտեի կողմից ներկայացված վիճակագրությունը, կարող ենք նկատել, որ սույն թվականի հուլիս-օգոստոս ամիսներին շուկայի ակտիվությունը ամենաբարձրն է: Այսպես՝

• 2017թ.-ի հուլիսին կտարավել են 3048, իսկ 2018թ.-ի հուլիսին՝ 4138 առուվաճառքի գործարք, այսինքն 35.8% ավել:

• 2017թ.-ի օգոստոսին կատարվել են 3596, իսկ 2018թ.-ի օգոստոսին 3979 առուվաճառքի գործարք, այսինքն 10.7% ավել:

Ոլորտի մասնագետների պնդմամբ Երևանում և մարզերում անշարժ գույքի գնաճը ավելացել է 5-10 տոկոսով: Համաձայն՝ Անշարժ գույքի կադաստրի կոմիտեի կողմից ներակայացված վիճակագրական տվյալների առավել աճ է արձանագրվել Երևանի Կենտրոն վարչական շրջանում 15.7 տոկոս:

Ճիշտ է հեղափոխությունը թողել է իր հետևանքները, բայց այնուամենայնիվ ներկայիս իրավիճակը համարվում է անկայուն և դրա պատճառով շատերը ձեռնպահ են մնում որևէ գույք գնելուց կամ վաճառելուց: Կանխատեսելի և թերևս իրատեսական է այն, որ առաջիկայում սպասվելիք խորհրդարանական ընտրություններից հետո անշարժ  գույքի շուկան էլ ավելի կակտիվանա և պահանջարկի արդյունքում գնաճը անխուսափելի կլինի: